આસામ સરકારે રાજ્યમાં બહુપત્નીત્વ પર પ્રતિબંધ મૂકવા માટેનો ડ્રાફ્ટ બિલ તૈયાર કરવા માટે પાંચ સભ્યોની સમિતિની રચના કરી છે. રાજ્યપાલ ગુલાબ ચંદ કટારિયાએ સમિતિની રચનાને લઈને એક જાહેરનામું બહાર પાડ્યું છે.
આસામના એડવોકેટ જનરલ દેવજીત સૈકિયા, ડીજીપી જીપી સિંહ, રાજ્યના વરિષ્ઠ એડિશનલ એડવોકેટ જનરલ નલીન કોહલી, કાનૂની સલાહકાર અને સચિવ રોમૈન બરુઆ અને ગૃહ વિભાગના સચિવ બિશ્વજીત પેગુનો તેમાં સમાવેશ કરવામાં આવ્યો છે. કાયદાનો મુસદ્દો તૈયાર કરવા ઉપરાંત, સમિતિ ખોટી ઓળખના આધારે આંતર-ધાર્મિક લગ્નો, બાળ લગ્નના કિસ્સામાં કાઝીની ભૂમિકા વગેરે જેવા અન્ય પાસાઓ પર પણ ધ્યાન આપશે.
સમિતિના સભ્યો કાયદા પંચના અધ્યક્ષ સાથે બેઠક કરશે અને 45 દિવસમાં રિપોર્ટ સુપરત કરશે. દરમિયાન, વિપક્ષ ઓલ ઈન્ડિયા યુનાઈટેડ ડેમોક્રેટિક ફ્રન્ટ (AIUDF) એ રાજ્યમાં સત્તારૂઢ ભાજપ સરકારની ટીકા કરી, અને આ મુદ્દે રાજકારણ રમવાનો આરોપ લગાવ્યો. AIUDF ધારાસભ્ય અમીનુલ ઈસ્લામે કહ્યું કે અમારા નેતા બદરુદ્દીન અજમલ કમિટિનો રિપોર્ટ જોશે અને પછી અમે પાર્ટી વતી સત્તાવાર નિવેદન જારી કરીશું.
15 નકલી કાઝીની ધરપકડ
બાળ લગ્નો કરવા બદલ 15 નકલી કાઝીની ધરપકડ આસામમાં, રાજ્ય સરકાર બાળ લગ્નો સામે સતત કડક પગલાં લઈ રહી છે. આ ક્રમમાં પોલીસે 15 લોકોની ધરપકડ કરી છે. આરોપ છે કે આ લોકોએ હૈલાકાંડી જિલ્લામાં નકલી દસ્તાવેજો તૈયાર કરીને બાળ લગ્ન કરાવ્યા છે. એડિશનલ એસપી શમીર દપ્તરી બરુઆએ જણાવ્યું હતું કે એક કાઝીએ ફરિયાદ કરી હતી કે 16 લોકો નકલી કાઝી બનીને બાળ લગ્ન કરાવે છે. પોલીસે બુધવારે જિલ્લાના વિવિધ ભાગોમાં ઓપરેશન હાથ ધર્યું હતું.
અધિકારીએ જણાવ્યું કે આખરે પોલીસે તમામ આરોપીઓની ધરપકડ કરી. દરેકને જુદા જુદા વિસ્તારમાંથી પકડવામાં આવ્યા છે. જો કે પુરાવાના અભાવે એકને છોડવો પડ્યો હતો. તે જાણીતું છે કે આસામ સરકારે આ દિવસોમાં બાળ લગ્ન વિરુદ્ધ અભિયાન શરૂ કર્યું છે.
