એક તરફ કેટલાક લોકો પુત્રના જન્મની ઈચ્છા રાખે છે. મહારાષ્ટ્રના પુણેમાં એક પરિવારે અલગ રીતે દીકરીના જન્મની ઉજવણી કરી. તેમણે અનોખી રીતે નવજાત શિશુનું ઘરે સ્વાગત કર્યું હતું. પુણેના શેલગાંવનો એક પરિવાર તેમના બાળકને હેલિકોપ્ટર દ્વારા ઘરે લઈ આવ્યો છે.
રાજલક્ષ્મી નામની બાળકીનો જન્મ 22 જાન્યુઆરીએ તેની માતાના ઘરે ભોસારીમાં થયો હતો. પરિવારે શિશુને શેલગાંવ, ખેડમાં તેના ઘરે લઈ જવા માટે હેલિકોપ્ટર ભાડે લીધું હતું. બાળકીના પિતા વિશાલ ઝારેકર (30 વર્ષ) વ્યવસાયે વકીલ છે. વિશાલે કહ્યું કે અમારા ઘરે લાંબા સમય બાદ બાળકીનો જન્મ થયો છે અને ખુશી અપાર છે.
એક લાખ રૂપિયા ખર્ચ્યા
વિશાલે કહ્યું, “હું અને મારી પત્ની રાજલક્ષ્મીને 2 એપ્રિલે હેલિકોપ્ટરમાં ઘરે લઈ આવ્યા હતા.” વિશાલે જણાવ્યું કે આ માટે 1 લાખ રૂપિયાનો ખર્ચ કરવામાં આવ્યો હતો. “અમે આશીર્વાદ લેવા જેજુરી ગયા હતા, પરંતુ અમને ઊડવાની મંજૂરી આપવામાં આવી ન હતી. એટલા માટે અમે આકાશને પ્રાર્થના કરી.’ ઝારેકરે વધુમાં જણાવ્યું હતું કે હેલિકોપ્ટર શેલગાંવમાં તેમના ફાર્મમાં સ્થાપિત કામચલાઉ હેલિપેડ પર ઉતર્યું હતું.