વડાપ્રધાન નરેન્દ્ર મોદી મહારાષ્ટ્રના શિરડી પહોંચ્યા છે. વડાપ્રધાને શિરડી સાંઈબાબા સમાધિ મંદિરની મુલાકાત લીધી હતી અને પૂજા કરી હતી. વડા પ્રધાન નરેન્દ્ર મોદી આજે મહારાષ્ટ્રના 86 લાખથી વધુ ખેડૂતોને લાભ આપવાના ઉદ્દેશ્યથી રૂ. 7,500 કરોડથી વધુના પ્રોજેક્ટ્સ લોન્ચ કરશે. શિરડીના પ્રસિદ્ધ શ્રી સાંઈબાબા મંદિરમાં પ્રાર્થના કર્યા પછી મોદી નવા દર્શન કતાર સંકુલનું ઉદ્ઘાટન કરશે, એમ એક સત્તાવાર નિવેદનમાં જણાવાયું છે. તે પછી તે નિલવંદે ડેમનું જલ પૂજન કરશે અને ડેમના નહેર નેટવર્કને રાષ્ટ્રને સમર્પિત કરશે અને બાદમાં શિરડીમાં આશરે રૂ. 7,500 કરોડના મૂલ્યની અનેક વિકાસ યોજનાઓના ઉદ્ઘાટન અને શિલાન્યાસ માટે એક જાહેર કાર્યક્રમમાં હાજરી આપશે.
PM ગોવામાં નેશનલ ગેમ્સનું ઉદ્ઘાટન કરશે
વડાપ્રધાન મોદી આજે જ ગોવાના ફાટોરડામાં 37મી નેશનલ ગેમ્સનું ઉદ્ઘાટન કરશે. 26 ઓક્ટોબરથી 9 નવેમ્બર સુધી ચાલનારા આ રમતોત્સવમાં લગભગ 10,000 ખેલાડીઓ ભાગ લેશે. ગોવામાં જન્મેલા ભારતીય વ્યાવસાયિક પવન સર્ફર કાત્યા ઇડા કોએલ્હો વડાપ્રધાનને મશાલ સોંપશે.
ગોવાના મુખ્ય પ્રધાન પ્રમોદ સાવંતે જણાવ્યું હતું કે ‘સુખવિંદર સિંહ અને હેમા સરદેસાઈ સહિતના પ્રખ્યાત કલાકારો ફાટોરડાના જવાહરલાલ નહેરુ સ્ટેડિયમમાં 5 કલાકના ભવ્ય ઉદ્ઘાટન સમારોહમાં પરફોર્મ કરશે.’ 28 ટીમોના એથ્લેટ્સ પરેડમાં ભાગ લેશે. આ સમારોહ રાષ્ટ્રીય એકતાની થીમ પર આધારિત હશે.
આવતીકાલે ઈન્ડિયા મોબાઈલ કોંગ્રેસનું ઉદ્ઘાટન કરશે
ટેલિકોમ ઉદ્યોગની દેશની સૌથી મોટી ઈવેન્ટ ઈન્ડિયા મોબાઈલ કોંગ્રેસનું ઉદ્ઘાટન વડાપ્રધાન નરેન્દ્ર મોદી કરશે. આ ત્રણ દિવસીય કાર્યક્રમ 27 ઓક્ટોબરથી નવી દિલ્હીના પ્રગતિ મેદાનમાં શરૂ થશે જેમાં 31 દેશો ભાગ લેશે. દૂરસંચાર વિભાગે સોશિયલ મીડિયા પર જણાવ્યું કે, આ કાર્યક્રમમાં એક લાખથી વધુ લોકો ભાગ લેશે. 1,300 થી વધુ પ્રતિનિધિઓ અને 400 થી વધુ વક્તા હશે. 225 પ્રદર્શકો અને 400 થી વધુ સ્ટાર્ટઅપ્સ હાજરી આપે તેવી અપેક્ષા છે.
