ટોક્યો ઓલિમ્પિકમાં ભારત માટે ગોલ્ડ મેડલ જીતનાર નીરજ ચોપરા હાલ સોશિયલ મીડિયા પર ચર્ચામાં છે. દરરોજ તેના ઘણા વીડિયો વાયરલ થતા રહે છે. તાજેતરમાં, તેણે એક મહિનામાં બીજી વખત સ્ટોકહોમ ડાયમંડ લીગ મીટ દરમિયાન પોતાનો જ રાષ્ટ્રીય રેકોર્ડ તોડ્યો અને નવો રાષ્ટ્રીય રેકોર્ડ બનાવ્યો અને સિલ્વર મેડલ જીત્યો.
હકીકતમાં જે વીડિયો સામે આવ્યો છે તેમાં નીરજ ચોપરાની નમ્રતા જોઈને દરેક લોકો તેના ફેન બની ગયા છે. વીડિયોમાં નીરજ એક વૃદ્ધ ફેનના પગને સ્પર્શ કરતો જોવા મળે છે. એવું કહેવામાં આવી રહ્યું છે કે સ્ટોકહોમમાં ફેનના એક ગ્રુપ સાથે વાતચીત કરતી વખતે અને તસવીરો લેતી વખતે નીરજે તેમને વિદાય આપતાં પોતાના વૃદ્ધ ફેનના પગને સ્પર્શ કર્યા હતા.
આ વીડિયો સોશિયલ મીડિયા પર ઝડપથી વાયરલ થઈ રહ્યો છે. સમાચાર લખાય છે ત્યાં સુધી આ વીડિયોને 2 લાખ 32 હજારથી વધુ વખત જોવામાં આવ્યો છે. એક વૃદ્ધ ફેનના ચરણ સ્પર્શ કરીને પાછા જતા નીરજ માટે એક ફેન વખાણ કરતાં કહે છે ‘સો ડાઉન ટુ અર્થ’.
તમને જણાવી દઈએ કે જૂનની શરૂઆતમાં તુર્કૂમાં Pavo Nurmi Athletics Meet દરમિયાન નીરજ ચોપરાએ 89.30 મીટર થ્રો કરીને પોતાનો જ રાષ્ટ્રીય રેકોર્ડ તોડ્યો હતો. જે બાદ હવે તેણે 30 જૂનના રોજ એક મહિનામાં બીજી વખત સ્ટોકહોમ ડાયમંડ લીગમાં 89.94 મીટરના થ્રો સાથે પોતાનો જ રેકોર્ડ તોડ્યો છે.
