હવામાન વિભાગે આજેગુજરાતમાં પાંચ દિવસ વરસાદ પડવાને લઈને આગાહી કરી છે. હવામાન વિભાગના જણાવ્યા પ્રમાણે રાજ્યમાં આગામી પાંચ દિવસ સુધી વરસાદ પડવાની સંભાવના છે. પાંચ દિવસ દરમિયાન આખા ગુજરાતમાં વરસાદ રહેશે. આ દરમિયાન સામાન્યથી હળવો વરસાદ પડશે. અમુક જગ્યાએ ભારેથી અતિભારે વરસાદ પડવાની સંભાવના છે. દક્ષિણ ગુજરાત અને સૌરાષ્ટ્રના દરિયાકાંઠાના વિસ્તારો ભાવનગર, પોરબંદર, દ્વારકા અને જૂનાગઢમાં પણ અમુક વિસ્તારોમાં ભારેથી અતિભારે વરસાદ પડી શકે છે. હવામાન વિભાગના જણાવ્યા પ્રમાણે પાંચ દિવસ અમદાવાદ શહેરમાં સામાન્યથી મધ્યમ વરસાદ પડી શકે છે. અમદાવાદ જિલ્લાના અમુક વિસ્તારોમાં ભારે વરસાદ પડી શકે છે.
આજે એટલે કે પાંચમી જુલાઈના રોજ વલસાડ, દમણ, દાદરા નગર હવેલીમાં ભારે વરસાદની સંભાવના છે. છ અને સાતમી જુલાઈના રોજ ગુજરાત રિઝનમાં ભારેથી અતિભારે વરસાદની આગાહી છે. ઉત્તર ગુજરાતમાં સાબરકાંઠા, બનાસકાંઠા, અરવલ્લીમાં ભારેથી અતિભારે વરસાદની સંભાવના છે. 8 જુલાઈના રોજ દક્ષિણ ગુજરાતના દમણ, દાદરા નગર હવેલી, સુરત અને ડાંગમાં અતિભારે વરસાદ પડી શકે છે.
સૌરાષ્ટ્ર અને કચ્છમાં ચાર દિવસ ભારેથી અતિભારે વરસાદ રહેશે. જોકે, છઠ્ઠી જુલાઈના રોજ સૌરાષ્ટ્રમાં વરસાદની એક્ટિવિટી ઓછી રહેશે. 9મી જુલાઈના રોજ સૌરાષ્ટ્ર કચ્છમાં અતિભારે વરસાદની સંભાવના છે. આ દરમિયાન દ્વારકા, જામનગર, જૂનાગઢ, રાજકોટમાં ભારેથી અતિભારે વરસાદ પડી શકે છે
મંગળવારે સવારે છ વાગ્યે પુરા થતા 24 કલાક દરમિયાન રાજ્યના 156 તાલુકામાં વરસાદ નોંધાયો છે. જેમાં સૌથી વધુ વલસાડના ઉમરગામમાં 6.36 ઇંચ વરસાદ વરસ્યો છે. આ સાથે વલસાડના પારડીમાં 5.44 ઇંચ વરસાદ નોંધાયો હતો. હવામાન વિભાગના કહેવા પ્રમાણે રાજ્યમાં આગામી પાંચ દિવસ સુધી વરસાદ રહેશે. આ દરમિયાન અમુક વિસ્તારોમાં ભારેથી અતિભારે વરસાદ પણ પડી શકે છે. આઠમી જુલાઈના રોજ ભારેથી અતિભારે વરસાદ પડવાની આગાહી છે.
