રાષ્ટ્રપતિ દ્રૌપદી મુર્મુએ રાષ્ટ્રીય સુરક્ષાને જોખમમાં મૂકતા સેના અધિકારી વિરુદ્ધ કાર્યવાહી કરી છે. અહેવાલ છે કે રાષ્ટ્રપતિએ ગયા મહિને જ મેજરને સેવામાંથી હટાવી દીધા હતા. લાંબી તપાસ બાદ અધિકારી સામે મોટી કાર્યવાહી કરવામાં આવી હતી. એવું કહેવામાં આવી રહ્યું છે કે તે સોશિયલ મીડિયા દ્વારા પાકિસ્તાનમાં કોઈના સંપર્કમાં પણ હતો.
એવું જાણવા મળે છે કે સેવાઓ સમાપ્ત થયા પહેલા, મેજર સ્ટ્રેટેજિક ફોર્સિસ કમાન્ડ (SFC)ના યુનિટમાં કામ કરતા હતા. એક અધિકારીએ નામ ન આપવાની શરતે જણાવ્યું કે ગયા વર્ષે જ SFCએ મેજર વિરુદ્ધ તપાસ માટે એક બોર્ડની રચના કરી હતી, જેમાં ઘણા વરિષ્ઠ અધિકારીઓનો સમાવેશ કરવામાં આવ્યો હતો. કમાન્ડર ઇન ચીફ બોર્ડના વડા હતા જે ભારતના પરમાણુ શસ્ત્રાગારની સંભાળ રાખતા હતા.
તપાસ દરમિયાન, બોર્ડના અધિકારીઓને મેજરના તમામ ડિજિટલ ઉપકરણોને જપ્ત કરવાની સત્તા પણ આપવામાં આવી હતી. ગોપનીય માહિતી શેર કરવા અથવા લીક કરવા, સોશિયલ મીડિયા નિયમોના ઉલ્લંઘન સહિત અન્ય સુરક્ષા સંબંધિત તપાસ માટે પણ આદેશ આપવામાં આવ્યા હતા.
અધિકારીઓએ માહિતી આપી હતી કે મેજર પાસે ઘણા ગોપનીય દસ્તાવેજો મળ્યા છે, જે તેણે પોતાના ઉપકરણમાં રાખ્યા હતા. આ સશસ્ત્ર દળોના નિયમોનું ઉલ્લંઘન છે. આ ઉપરાંત, તે સોશિયલ મીડિયા દ્વારા પાકિસ્તાની ગુપ્તચર તંત્રના કોઈના સંપર્કમાં પણ હતો.
સમાચાર એજન્સી પીટીઆઈના જણાવ્યા અનુસાર, સૂત્રોએ જણાવ્યું હતું કે રાષ્ટ્રપતિ, જેઓ ત્રણેય સેવાઓના સર્વોચ્ચ કમાન્ડર પણ છે, તેમણે આર્મી એક્ટ, 1950 હેઠળ સત્તાના પ્રયોગમાં મેજરની સેવાઓને સમાપ્ત કરવાના આદેશ પર હસ્તાક્ષર કર્યા.
